කංකුං කෑවොත් මොකද වෙන්නේ?

ශාකයේ ස්වභාවය

ඉතා ලස්සන පැළෑටියක් වන මෙය හරිත වර්ණයෙන් (කොළ පැහැයෙන්) යුක්තය. දිගටි පත්‍ර සේම හොදින් සරුවට වැඩෙන විට පත්‍ර පළල්ව සෑදේ. පැළෑටිය අඩි 1 1/2 ක් 2ක් පමණ උසට වැඩේ. දණ්ඩේ පුරුක් සහිතය. සුදු පැහැයට හුරු අලංකාර මලකි.කොළය සහ දණ්ඩේ පුරුක් අශ්‍රිතව මල් හට ගනී. 

මඩ සහිත වගුරු බිම්වල ඉතා සරුවට මෙම පැළෑටිය වගා කරනු දක්නට ලැබේ. දඩු කැබලි වලින් බෝ කරගත හැකිය.

ඇතැම්විට හීන් දිගටි පත්‍ර සහිත කංකුං සහ තරමක් විශාල පත්‍ර සහිත කංකුං ද දක්නට ඇතිමුත් ශාකයේ ප්‍රභේදයක් නොමැත. පසේ සරු බවත් කාබනික පොහොර යෙදීමත් හේතුවෙන් වෙනස පෙන්නුම් කරයි.

පැළෑටියේ ගුණ

මදුර රසයෙන්ද, ශීත ගුරු ගණයෙන්ද,ශීත වීර්‍යයෙන්ද, විතකයෙන් මදුරද වන මෙම පැළෑටිය බහුල වශයෙන් පලාවක් ලෙස ආහාරයට එක්කර ගැනීමට ගෘහනියෝ පුරුදුව සිටිති. 

එසේම එහි පවත්නා ඖෂදීය ගුණය අප ශරීරයට ලබා ගන්නේද ආහාර ලෙස සකස් කිරීම මගින්ම වීමද මෙම ශාකයේ ඇති සුවිශේෂත්වයයි.

ආයුර්වේද පොත්පත් වල ව්‍යංජනයක් ලෙස සේම තෙලකින් මලවා බැද ආහාර සදහා ගතයුතු බවත් දක්වා ඇත. 

මෙම පැළෑටියේ ඇති සුවිශේෂ ගුණයන් වන්නේ

• මව්කිරි වර්දනය කිරීම.
• ශුක්‍ර දාතුව වර්දනය කිරීම.

එසේම මව්කිරි පිරිසිදු කිරීමේ හැකියාවද මෙම පැළෑටියට ඇත.

ශුක්‍ර දෝෂ වලදී ශුක්‍ර වල අල්ප තාවය දුරුකර එය වර්දනය කිරීමට, එහි වර්ණය නිසි පරිදි ගෙන ඒමට, ශුක්‍ර තරලවල ද්‍රව බව අඩුකර අවශ්‍ය පරිදි ඝණභාවයට පත් කිරීමට සුවිශේෂී හැකියාවක් කංකුං වලට තිබේ.

එසේම අර්ෂස් අමාරු රෝග වලට, ඇගේ දැවිල්ල මල බද්දතාවය වැනි රෝග අවස්තා වලදී සුදුසු ආහාරයක් සේම ඖෂදයක් ලෙසද භාවිතයට ගත හැකි අගනා පළාවකි. 

ආමයික ප්‍රයෝග

• තනකිරි වැඩීමට

කංකුං කිරට උයා හෝ එළගිතෙලෙන් බැද හෝ මැල්ලුමක් ලෙස ආහාරයට ගැනීම

• ලේ විෂ වූ විට

කංකුං කොටා යුෂ මේස හැදි 2 ක් පමණ බීමට.

• ශුක්‍ර වල දියාරු ගතියට

කංකුං කොළ එළගිතෙලෙන් බැද පය 4 කට පෙර කෑමට ගැනීම.

• ලිංගික අප්‍රාණිකත්වයට

කංකුං යුෂ අවුන්ස 1 ක් අමුක්කරා අල චූර්ණ තේ හැදි 1/2 කට දමා එළගිතෙලෙන් මදක් බැද කෑමට ගැනීම.

• පීනසයට

ව්‍යංජනයක් ලෙස හෝ මැල්ලුම් මලවා ආහාරයට ගැනීම.

එසේම කංකුං ශාකය කොළ පිටින් කඩාදමා දණ්ඩ අගල් 1 1/2 ක් වැනි ප්‍රමාණයට කඩා හරිත වර්ණ පැහැය මැකෙන්නට නොදී ව්‍යංජනයක් ලෙස සකස් කර ගැනීමෙන් එහි ඇති ඖෂදීය ගුණය සේම ආහාරයක් සේ ගන්නා ගුණයද රසයද නොනැසී පැවතීමට හේතුවක් වනු ඇත.